Ingevolge Artikel 3(3)(a) van die Boedelbelastingwet word die opbrengs van sekere plaaslike lewenspolisse op die lewe van die oorledene as geagte bates vir boedelbelasting ingesluit.
Aangesien die opbrengs van hierdie polisse net na afsterwe betaalbaar word, word dit nie as ’n bate op datum van afsterwe beskou nie en dus nie by die likwidasierekening van die boedel ingesluit nie. Iemand word egter deur die opbrengs van die lewenspolis bevoordeel en daarom word dit wel vir boedelbelasting in ag geneem.
Die volgende drie plaaslike lewenspolisse word nie as geagte bates vir boedelbelasting van die oorledene beskou nie:
- ‘n Lewenspolis wat deur middel van ’n geregistreerde voor- of na-huwelikse kontrak geskenk word en verhaalbaar is deur die nagelate gade of ’n kind van die oorledene (Artikel 3(3)(a)(i)). Die lewenspolis hoef nie ten tye van die sluiting van die huweliksvoorwaardekontrak te bestaan nie, maar die kontrak moet daarna verwys dat ’n lewenspolis wel uitgeneem sal word. Aangesien Artikel 4q van die Boedelbelastingwet in elk geval voorsiening maak vir die aftrekking van enige voordele wat die nagelate gade van die oorledene ontvang, hou hierdie vrystelling groter waarde in vir kinders van die oorledene.
- Koop- en verkoop ooreenkomste. ‘n Lewenspolis wat deur die vennoot of mede-aandeelhouer van die oorledene uitgeneem word met die doel om die oorledene se belang of aandeelhouding in geheel of gedeeltelik in terme van ’n koop- en verkoopooreenkoms (Artikel 3(3)(a)(iA)) te bekom. Om vir die vrystelling te kwalifiseer moes die oorledene nie die premies ten opsigte van die polis betaal het nie en die persoon wat die polis uitneem moet ‘n vennoot of ‘n mede-aandeelhouer ten tye van afsterwe wees.
- Polisse nie betaalbaar aan die oorledene se boedel, afhanklikes, familielede of ‘n familiemaatskappy. Die oorledene moes nie die premies ten opsigte van die lewenspolis betaal het nie (Artikel 3(3)(a)(ii)). ‘n Sleutelmanpolis is ‘n voorbeeld hiervan waar ’n maatskappy ’n lewenspolis op die lewe van ’n sleutel werknemer uitneem om finansiële verliese by die afsterwe van die werknemer, te beperk.
Indien ’n lewensversekeringspolis nie in terme van een van bogenoemde vrystellings vir boedelbelasting uitgesluit word nie, moet die boedelbelasting daarop deur die begunstigde van die opbrengs van die polis betaal word.
Alle premies wat egter deur die persoon wat die opbrengs van die polis ontvang het betaal was tot datum van afsterwe, plus 6% rente per jaar (Artikel 3(3)(a)), word vrygestel van boedelbelasting en kan dus afgetrek word van die opbrengs van die polis. In die praktyk laat SARS wel saamgestelde rente op die premies toe.
Indien u enige navrae het, kontak gerus vir Morné van Niekerk by morne@fhbc.co.za of Marius Vorster by mvorster@fhbc.co.za.