Volgens statistiek beskik ‘n verbasend groot persentasie van Suid-Afrikaners en professionele individue nie oor testamente of geldige testamente nie. Die gevolge van hierdie situasie word foutiewelik baie ligtelik opgeneem.
Indien ‘n persoon sonder ‘n geldige testament te sterwe sou kom, sal sy/haar boedel volgens die Wet op Intestate Erfopvolging 81 van 1987 verdeel word.
Behalwe dat die benoeming van ‘n geskikte eksekuteur tot vertragings kan lei is intestate (sonder testament) vererwing in meeste gevalle ‘n ingewikkelde en onnodige gekompliseerde proses, wat verhoed kon word indien daar wel ‘n geldige testament bestaan het, waarvolgens ‘n boedel afgehandel kon word.
Slegs ouers, kinders of gades van ‘n oorledene sal kwalifiseer om sonder die lewering van sekuriteit as eksekuteur benoem en aangestel te word. In baie gevalle skep dit reeds vroeg in die administrasie-proses wrywing, aangesien die kinders byvoorbeeld nie onderling kan besluit oor wie van hulle moontlik as eksekuteur aangestel moet word nie.
Indien ‘n buite-party of firma as eksekuteur aangestel word, moet die benoemde eksekuteur sekuriteit vir sy benoeming verskaf en dit het addissionele kostes tot gevolg.
Die Wet op Intestate Erfopvolging kan ook moeilik wees om te interpreteer vir individue wat nie vertroud is met die Wetgewing en administrasie van intestate boedels nie, wat gevolglik kan lei tot verkeerde advies, wat nie net addissionele kostes tot gevolg kan hê nie, maar ook sal lei tot onnodige vertragings.
Om ’n testament te hê, gee rigting vir die bestuur van u boedelbates. ‘n Testament gee egter net ‘n aanduiding van hoe die bates versprei moet word. Dit is dus raadsaam om ‘n testament te laat opstel deur ‘n persoon of instansie wat ook leiding kan bied ten opsigte van die ontleding van u boedel. Dit verseker dat die testament nie net aan u behoeftes voldoen nie, maar ook Boedelbelasting en/of Kapitaalwinsbelasting so effektief moontlik aanspreek.
Daar is deesdae so baie faktore wat aanleiding gee tot die vertragings in die administrasie-proses van ‘n boedel dat u ten alle kostes moet verseker dat u oor ‘n geldige testament beskik, om ten minste sover moontlik te verhoed dat intestate vererwing nie die standaard proses en prosedures nog verder vertraag nie.
Dit is dus duidelik dat dit raadsaam is om u testament- en boedelsake in orde te kry of indien u wel ‘n testament het, seker te maak dat die dokument nog u behoeftes korrek aanspreek.
Kontak gerus vir Marius Vorster by mvorster@fhbc.co.za of vir Morné van Niekerk by morne@fhbc.co.za met enige navrae.