Niks is nader aan ‘n ouer se hart as die veiligheid, geluk en welstand van hul kinders nie.
Dit is moeilik om te glo dat u as ouer nie noodwendig meer gaan leef om te sien hoe u kind(ers) volwassenheid bereik, trou en hul eie kinders sal hê nie, maar dit is ongelukkig nie vir almal beskore nie.
Baie families word met hierdie hartverskeurende situasie gekonfronteer en die belangrikheid van korrekte testament-beplanning kan dus nie genoeg beklemtoon word nie en is die toekoms van ‘n minderjarige kind(ers) afhanklik van deeglike en korrekte beplanning deur sy/haar ouers.
Statistiek dui juis daarop dat slegs ongeveer 30% van volwasse Suid-Afrikaners ‘n geldige Testament in plek het.
Dit is vanselfsprekend dat ‘n Testament deeglike voorsiening moet maak vir kinders wat nog nie ouderdom van meerderjarigheid bereik het nie.
Hierdie meestal eenvoudige, maar belangrike dokument laat u toe om u wense duidelik uiteen te sit en te bepaal wie wat erf en hoe die verdeling moet plaasvind.
Minderjarige kinders (onder die ouderdom van 18) kan nie bates direk erf nie.
Indien ‘n Testament dus nie voorsiening maak dat ‘n minderjarige erfgenaam se erfenis onder die beheer van Trustees in ‘n Trust geplaas en geadministreer moet word nie, sal dit beteken dat enige bemakings aan sodanige erfgename betaalbaar sal wees aan die Meester se Voogdyfonds vir bewaring totdat die erfgename meerderjarige ouderdom bereik.
Om voordele/onderhoud uit hierdie fonds te eis is ‘n moeisame en uiters frustrerende proses waaraan ‘n mens nie die Voogde, en by implikasies ook u kinders, wil onderwerp nie.
Met deeglike testament-beplanning kan hierdie situasie vermy word en kan die Testament so opgestel word om duidelik voorsiening te maak dat minderjarige erfgename se erfenisse in ‘n Trust geplaas word en dat daar duidelike instruksies aan die Trustees gegee word oor hoe die Trustfondse tot die beste voordeel van die betrokke trustbevoordeeldes beheer en bestuur kan word.
Ons het kundige personeel wat u kan bystaan met professionele diens met die korrekte opstel van ‘n Testament, wat ook sal verseker dat u behoeftes korrek aangespreek word.
Vir hulp, kontak gerus vir Marius Vorster by mvorster@fhbc.co.za of Morné van Niekerk by morne@fhbc.co.za